ന്യൂയോർക്ക്: ഫിഫ ലോകകപ്പിലെ ഗ്രൂപ്പ് സി പോരാട്ടത്തിൽ ബ്രസീലിനെ ഞെട്ടിച്ച് മൊറോക്കോ. തുടക്കം മുതൽ ആക്രമണ ഫുട്ബോൾ പുറത്തെടുത്ത മൊറോക്കോ മുൻ ചാമ്പ്യൻമാരെ വിറപ്പിച്ചെങ്കിലും മത്സരം 1-1 സമനിലയിൽ അവസാനിച്ചു.മത്സരത്തിന്റെ ആദ്യ മിനിറ്റുകൾ മുതൽ തന്നെ മൊറോക്കോയാണ് കളം നിയന്ത്രിച്ചത്. ബ്രാഹിം ഡിയാസ്, ബിലാൽ എൽ ഖാനൂസ്, അസെദിൻ ഒനാഹി എന്നിവർ നയിച്ച മുന്നേറ്റങ്ങൾ ബ്രസീൽ പ്രതിരോധത്തിന് വലിയ തലവേദനയായി. അതിന്റെ ഫലമായി 21-ാം മിനിറ്റിൽ ഇസ്മായിൽ സായ്ബാറിയിലൂടെ മൊറോക്കോ ലീഡെടുത്തു. ബ്രാഹിം ഡിയാസിന്റെ മനോഹരമായ പാസിൽ നിന്നെത്തിയ അവസരം സായ്ബാറി കൃത്യമായി വലയിലെത്തിക്കുകയായിരുന്നു.ഗോൾ വഴങ്ങിയതോടെ ബ്രസീൽ ഉണർന്നു. 32-ാം മിനിറ്റിൽ വിനീഷ്യസ് ജൂനിയർ തന്റെ മികവ് പുറത്തെടുത്ത് സമനില ഗോൾ നേടി. ഇടത് വിങ്ങിലൂടെ കുതിച്ചുകയറിയ താരം അസാധാരണമായ കോണിൽ നിന്നുള്ള ഷോട്ടിലൂടെയാണ് മൊറോക്കൻ വല കുലുക്കിയത്.രണ്ടാം പകുതിയിലും മൊറോക്കോയുടെ ആക്രമണങ്ങൾക്ക് കുറവുണ്ടായില്ല. മസ്റാവിയുടെ നേതൃത്വത്തിൽ വലതുവിങിലൂടെ നടന്ന മുന്നേറ്റങ്ങൾ പലതവണ ബ്രസീൽ പ്രതിരോധത്തെ സമ്മർദത്തിലാക്കി. മറുവശത്ത് വിനീഷ്യസും ബ്രൂണോ ഗിമാറസും ചേർന്ന് ബ്രസീലിനായി അവസരങ്ങൾ ഒരുക്കിയെങ്കിലും വിജയഗോൾ നേടാനായില്ല.അവസാന വിസിൽ മുഴങ്ങുമ്പോൾ സമനിലയായിരുന്നു ഫലം. എന്നാൽ കളിയുടെ ഒഴുക്ക് നോക്കിയാൽ ബ്രസീലിനെക്കാൾ മികച്ച പ്രകടനം കാഴ്ചവെച്ചത് മൊറോക്കോ തന്നെയായിരുന്നു. ലോകകപ്പിലെ ശക്തമായ മുന്നറിയിപ്പാണ് ഈ പ്രകടനത്തിലൂടെ മൊറോക്കൻ ടീം നൽകിയത്.