താമരശ്ശേരി ചുരത്തിന് ബദൽ; പൂഴിത്തോട്-പടിഞ്ഞാറത്തറ പാതയ്ക്കായി വീണ്ടും സമ്മർദ്ദം ശക്തം

കോഴിക്കോട്/വയനാട്: താമരശ്ശേരി ചുരത്തിലെ രൂക്ഷമായ ഗതാഗതക്കുരുക്കിനും മഴക്കാലത്ത് പതിവാകുന്ന മണ്ണിടിച്ചിൽ ഭീഷണിക്കും ശാശ്വത പരിഹാരമായി കണക്കാക്കപ്പെടുന്ന പൂഴിത്തോട്-പടിഞ്ഞാറത്തറ ബദൽ റോഡ് പദ്ധതിക്കായി വീണ്ടും സമ്മർദ്ദം ശക്തമാകുന്നു. വർഷങ്ങളായി ചർച്ചകളിൽ ഒതുങ്ങിക്കിടക്കുന്ന പദ്ധതിയുടെ സാങ്കേതിക തടസ്സങ്ങൾ എത്രയും വേഗം നീക്കി നിർമ്മാണ നടപടികൾ ആരംഭിക്കണമെന്ന ആവശ്യം ശക്തമായിരിക്കുകയാണ്.ഇതിനായി ജനപ്രതിനിധികൾ പൊതുമരാമത്ത് വകുപ്പ് മന്ത്രിക്ക് സംയുക്ത നിവേദനം സമർപ്പിച്ചു. എം.പി.യായ ഷാഫി പറമ്പിൽ , എം.എൽ.എയായ ഫാത്തിമ താഹല്യ എന്നിവരുടെ നേതൃത്വത്തിലാണ് ഇടപെടൽ ആവശ്യപ്പെട്ടത്.കോഴിക്കോട് ജില്ലയിലെ പൂഴിത്തോടിനെയും വയനാട് ജില്ലയിലെ പടിഞ്ഞാറത്തറയെയും ബന്ധിപ്പിക്കുന്ന ഈ ബദൽ പാത യാഥാർഥ്യമായാൽ മലബാറിലെ ഗതാഗത മേഖലയ്ക്ക് വലിയ ആശ്വാസമാകും. താമരശ്ശേരി ചുരത്തെ ആശ്രയിക്കുന്ന ആയിരക്കണക്കിന് യാത്രക്കാർക്കും ചരക്കുവാഹനങ്ങൾക്കും ഇത് മികച്ചൊരു ബദൽ മാർഗമാകുമെന്നാണ് വിലയിരുത്തൽ.വനഭൂമി സംബന്ധമായ അനുമതികളും മറ്റ് സാങ്കേതിക പ്രശ്നങ്ങളും പരിഹരിച്ച് പദ്ധതി വേഗത്തിൽ നടപ്പാക്കണമെന്ന് വിവിധ ജനപ്രതിനിധികളും വ്യാപാര-സാമൂഹിക സംഘടനകളും ആവശ്യപ്പെട്ടു. വയനാടിന്റെ വികസനത്തിനും വിനോദസഞ്ചാര മേഖലയ്ക്കും നിർണായകമായ ഈ പദ്ധതി യാഥാർഥ്യമാക്കാൻ സർക്കാർ അടിയന്തര നടപടി സ്വീകരിക്കണമെന്ന ആവശ്യവും ശക്തമാകുകയാണ്

.#PoozhithodePadinjaratharaRoad #WayanadAlternativeRoad #ThamarasseryChuram #KeralaNews