കോഴിക്കോട്: പോളിയോ എന്ന മാരകരോഗത്തെ ലോകത്ത് നിന്ന് പൂർണമായും തുടച്ചുനീക്കുക എന്ന ലക്ഷ്യത്തോടെ ജൂൺ 28-ന് ജില്ലയിൽ പൾസ് പോളിയോ ദിനം ആചരിക്കുന്നു. അഞ്ച് വയസ്സിന് താഴെയുള്ള എല്ലാ കുട്ടികൾക്കും പോളിയോ പ്രതിരോധ തുള്ളിമരുന്ന് നൽകാൻ ആരോഗ്യവകുപ്പ് വിപുലമായ ഒരുക്കങ്ങളാണ് നടത്തിയത്.പോളിയോ വൈറസ് നാഡീവ്യവസ്ഥയെ ബാധിച്ച് സ്ഥിരമായ അംഗവൈകല്യത്തിന് കാരണമാകുന്ന ഗുരുതര രോഗമാണ്. രോഗലക്ഷണങ്ങൾ ഇല്ലാതെ തന്നെ വൈറസ് പകരാൻ സാധ്യതയുള്ളതിനാൽ, എല്ലാ കുട്ടികൾക്കും പ്രതിരോധ തുള്ളിമരുന്ന് നൽകുന്നത് അത്യന്താപേക്ഷിതമാണെന്ന് ആരോഗ്യവിദഗ്ധർ ഓർമ്മിപ്പിക്കുന്നു.ജില്ലയിലെ സർക്കാർ ആശുപത്രികൾ, പ്രാഥമികാരോഗ്യ കേന്ദ്രങ്ങൾ, അങ്കണവാടികൾ, ബസ് സ്റ്റാൻഡുകൾ, റെയിൽവേ സ്റ്റേഷനുകൾ തുടങ്ങിയ സ്ഥലങ്ങളിൽ പ്രത്യേക പോളിയോ ബൂത്തുകൾ പ്രവർത്തിക്കും. കൂടാതെ ആരോഗ്യപ്രവർത്തകരും ആശാ വർക്കർമാരും വീടുകൾ സന്ദർശിച്ച് ബൂത്തിലെത്താൻ കഴിയാത്ത കുട്ടികൾക്കും മരുന്ന് ഉറപ്പാക്കും.ലോകാരോഗ്യ സംഘടനയുടെ മാനദണ്ഡങ്ങൾ പ്രകാരം ഇന്ത്യ പോളിയോ മുക്ത രാജ്യമായി അംഗീകരിക്കപ്പെട്ടിട്ടുണ്ടെങ്കിലും, വൈറസ് വീണ്ടും കടന്നുവരാനുള്ള സാധ്യത പൂർണമായും ഇല്ലാതായിട്ടില്ല. അതിനാൽ ഓരോ പൾസ് പോളിയോ ക്യാമ്പയിനിലും എല്ലാ കുട്ടികൾക്കും തുള്ളിമരുന്ന് നൽകേണ്ടത് പൊതുജനങ്ങളുടെ കൂട്ടായ ഉത്തരവാദിത്തമാണ്.”രണ്ട് തുള്ളി ജീവൻ – ഓരോ കുട്ടിക്കും, ഓരോ തവണയും” എന്ന സന്ദേശവുമായി എല്ലാ രക്ഷിതാക്കളും അഞ്ച് വയസ്സിന് താഴെയുള്ള കുട്ടികളെ സമീപത്തെ പോളിയോ ബൂത്തിലെത്തിച്ച് പ്രതിരോധ തുള്ളിമരുന്ന് നൽകണമെന്ന് ആരോഗ്യവകുപ്പ് അഭ്യർഥിച്ചു.