കോഴിക്കോട്: ഗൾഫ് രാജ്യങ്ങളിലെ സ്കൂളുകൾ അവധിയായതോടെ നാട്ടിലെത്താൻ കാത്തിരുന്ന മലയാളി കുടുംബങ്ങൾ കടുത്ത യാത്രാ പ്രതിസന്ധി നേരിടുന്നു. വിമാന സർവീസുകളുടെ കുറവും കുത്തനെ ഉയർന്ന ടിക്കറ്റ് നിരക്കുമാണ് യാത്രക്കാരെ വലയ്ക്കുന്നത്.ഇറാൻ–ഇസ്രായേൽ സംഘർഷത്തെ തുടർന്ന് കുറച്ച വിമാന സർവീസുകൾ ഇതുവരെ പൂർണമായും പുനഃസ്ഥാപിച്ചിട്ടില്ല. ഇതോടെ ഗൾഫിൽ നിന്ന് കേരളത്തിലേക്കുള്ള വിമാന ടിക്കറ്റുകളുടെ നിരക്ക് സാധാരണയേക്കാൾ മൂന്നിരട്ടി വരെ ഉയർന്നിരിക്കുകയാണ്.ദുബായ്–തിരുവനന്തപുരം റൂട്ടിൽ ചില സർവീസുകളിൽ ടിക്കറ്റ് നിരക്ക് 45,000 മുതൽ 60,000 രൂപ വരെയാണ്. സർവീസുകൾ കുറച്ചതോടെ സീറ്റുകളുടെ ലഭ്യതയും ഗണ്യമായി കുറഞ്ഞിട്ടുണ്ട്.സുരക്ഷാ കാരണങ്ങളാൽ ബദൽ വ്യോമപാതകൾ സ്വീകരിക്കുന്നതിനാൽ യാത്രാസമയവും വർധിച്ചിട്ടുണ്ട്. നേരിട്ടുള്ള വിമാനങ്ങൾക്ക് അധികസമയം വേണ്ടിവരുമ്പോൾ, കണക്ടിംഗ് വിമാനങ്ങളിൽ യാത്ര 24 മണിക്കൂർ വരെ നീളുന്ന സാഹചര്യമാണ്.അവധി ആഘോഷിക്കാൻ നാട്ടിലെത്താൻ പദ്ധതിയിട്ടിരുന്ന നിരവധി പ്രവാസി കുടുംബങ്ങൾ ഉയർന്ന ടിക്കറ്റ് നിരക്കും സീറ്റുകളുടെ ക്ഷാമവും കാരണം യാത്ര മാറ്റിവയ്ക്കുകയോ റദ്ദാക്കുകയോ ചെയ്യേണ്ട സാഹചര്യമാണെന്ന് യാത്രക്കാർ പറയുന്നു.