ന്യൂഡൽഹി: ഇന്ത്യ-ചൈന അതിർത്തിരേഖയായ ലൈൻ ഓഫ് ആക്ച്വൽ കൺട്രോളിലെ (എൽ.എ.സി) സാഹചര്യങ്ങൾ സംബന്ധിച്ച് ഇന്ത്യയും ചൈനയും ബീജിങിൽ നിർണായക ചർച്ച നടത്തി. ഇരു രാജ്യങ്ങളും തമ്മിലുള്ള ബന്ധം സാധാരണ നിലയിലാക്കുന്നതിൽ ചർച്ചകൾ പുരോഗതിക്ക് വഴിയൊരുക്കിയതായി വിലയിരുത്തപ്പെട്ടു.ബുധനാഴ്ച ബീജിങിൽ നടന്ന വർക്കിംഗ് മെക്കാനിസം ഫോർ കൺസൾട്ടേഷൻ ആൻഡ് കോർഡിനേഷൻ (ഡബ്ല്യു.എം.സി.സി) യോഗത്തിലാണ് അതിർത്തി മേഖലയിലെ നിലവിലെ സാഹചര്യം വിശദമായി ചർച്ച ചെയ്തത്. ചർച്ചകൾ നിർമ്മാണാത്മകവും ഭാവിയിലേക്ക് പ്രതീക്ഷ നൽകുന്നതുമായിരുന്നുവെന്ന് ഇന്ത്യയുടെ വിദേശകാര്യ മന്ത്രാലയം അറിയിച്ചു.2020ൽ ഗൽവാൻ വാലിയിൽ ഉണ്ടായ രൂക്ഷ സംഘർഷത്തിന് പിന്നാലെ ഇന്ത്യ-ചൈന ബന്ധത്തിൽ വലിയ തിരിച്ചടിയുണ്ടായിരുന്നു. നാല് വർഷത്തിലേറെയായി തുടരുന്ന അതിർത്തി സംഘർഷവും സൈനിക വിന്യാസവും ഇരു രാജ്യങ്ങളുടെയും നയതന്ത്ര ബന്ധത്തെ ബാധിച്ചിരുന്നു. എന്നാൽ കഴിഞ്ഞ ഒരു വർഷത്തിനിടെ അതിർത്തി മേഖലയിൽ സമാധാനവും സ്ഥിരതയും ഉറപ്പാക്കാൻ നിരവധി തലങ്ങളിൽ ചർച്ചകളും നടപടികളും ഇരു രാജ്യങ്ങളും സ്വീകരിച്ചു വരികയാണ്.‘ഇന്ത്യ-ചൈന അതിർത്തി പ്രദേശങ്ങളിലെ സാഹചര്യം ഇരു പക്ഷവും അവലോകനം ചെയ്തു. അതിർത്തി മേഖലയിൽ സമാധാനവും ശാന്തതയും നിലനിർത്തുന്നതിൽ കൈവരിച്ച പുരോഗതിയിൽ സംതൃപ്തി രേഖപ്പെടുത്തി. ഇത് ഉഭയകക്ഷി ബന്ധം ക്രമേണ സാധാരണ നിലയിലാക്കാൻ സഹായിച്ചു’ എന്ന് വിദേശകാര്യ മന്ത്രാലയം പ്രസ്താവനയിൽ അറിയിച്ചു.അതിർത്തി പ്രശ്നങ്ങൾ പരിഹരിച്ച് സാമ്പത്തിക-നയതന്ത്ര സഹകരണം ശക്തിപ്പെടുത്താനുള്ള ശ്രമങ്ങൾ തുടരുമെന്ന സൂചനയും ചർച്ചകളിലൂടെ പുറത്തുവന്നു.