ടെഹ്റാൻ: അമേരിക്കയുമായി നിലവിൽ യാതൊരു തരത്തിലുള്ള ആണവ ചർച്ചകളും നടക്കുന്നില്ലെന്ന് ഇറാൻ വ്യക്തമാക്കി. രാജ്യത്തിന്റെ പ്രധാന പരിഗണന നിലവിലുള്ള സംഘർഷം അവസാനിപ്പിക്കലാണെന്നും ആണവ കരാർ സംബന്ധിച്ച ചർച്ചകൾ ഇപ്പോൾ അജണ്ടയിലില്ലെന്നും ഇറാൻ വിദേശകാര്യ മന്ത്രാലയ വക്താവ് Esmail Baghaei പറഞ്ഞു.അമേരിക്കൻ പ്രസിഡന്റ് Donald Trump ഇറാനുമായുള്ള ആണവ കരാർ വേഗത്തിൽ പൂർത്തിയാക്കാൻ ആഗ്രഹിക്കുന്നുവെന്ന റിപ്പോർട്ടുകൾ പുറത്തുവന്ന സാഹചര്യത്തിലാണ് ഇറാന്റെ പ്രതികരണം.”ആണവ കാര്യങ്ങളിൽ എപ്പോൾ നടപടിയെടുക്കണമെന്ന് ഞങ്ങൾക്കറിയാം. ആണവ കരാർ സംബന്ധിച്ച് ഒരു ചർച്ചയും നടന്നിട്ടില്ല. ഈ ഘട്ടത്തിൽ യുദ്ധം അവസാനിപ്പിക്കുക എന്നതാണ് ഞങ്ങളുടെ മുൻഗണന,” എന്ന് ഇസ്മയിൽ ബഖാഇ വാർത്താസമ്മേളനത്തിൽ വ്യക്തമാക്കി.ഇറാനും അമേരിക്കയും തമ്മിൽ നയതന്ത്ര തലത്തിൽ ആശയവിനിമയം തുടരുന്നുണ്ടെങ്കിലും ചർച്ചകളിൽ പുരോഗതി കൈവരിക്കാനാകാത്തതിന് അമേരിക്കയുടെ മാറിക്കൊണ്ടിരിക്കുന്ന നിലപാടുകളാണ് കാരണമെന്ന് ഇറാൻ ആരോപിച്ചു. ഓരോ ഘട്ടത്തിലും പുതിയ ആവശ്യങ്ങൾ മുന്നോട്ടുവയ്ക്കുകയും മാധ്യമങ്ങളിലൂടെ പരസ്പരവിരുദ്ധ സന്ദേശങ്ങൾ നൽകുകയും ചെയ്യുന്നതാണ് ചർച്ചകൾ നീണ്ടുപോകാൻ കാരണമായതെന്ന് ബഖാഇ പറഞ്ഞു.അമേരിക്കയുടെ നിലപാടുകളിലെ വൈരുദ്ധ്യങ്ങൾ കാരണം അന്തിമ തീരുമാനങ്ങളിലെത്താൻ കഴിയുന്നില്ലെന്നും കടുത്ത സംശയത്തിന്റെയും അവിശ്വാസത്തിന്റെയും അന്തരീക്ഷത്തിലാണ് നിലവിൽ ആശയവിനിമയം നടക്കുന്നതെന്നും അദ്ദേഹം കൂട്ടിച്ചേർത്തു.ദേശീയ സുരക്ഷയ്ക്ക് ഭീഷണിയുണ്ടായാൽ ആവശ്യമായ നടപടികൾ സ്വീകരിക്കുമെന്നും ഇറാൻ മുന്നറിയിപ്പ് നൽകി. മേഖലയിലെ സംഘർഷാവസ്ഥ തുടരുന്നതിനിടെ ആണവ കരാർ വിഷയത്തിൽ ഇരു രാജ്യങ്ങളും തമ്മിലുള്ള ഭിന്നത കൂടുതൽ രൂക്ഷമാകുന്നതായാണ് പുതിയ സംഭവവികാസങ്ങൾ സൂചിപ്പിക്കുന്നത്