ലഖ്നൗ: തെരുവ് കച്ചവടക്കാരിൽ നിന്ന് ഭക്ഷ്യവസ്തുക്കൾ വാങ്ങിയ ശേഷം പണം നൽകാതെ ഔദ്യോഗിക സ്ഥാനം ദുരുപയോഗം ചെയ്തെന്ന പരാതിയെ തുടർന്ന് ഉത്തർപ്രദേശ് പോലീസിലെ ഒരു കോൺസ്റ്റബിളിനെ സർവീസിൽ നിന്ന് പുറത്താക്കി.ഘടപൂർ സ്വദേശിയായ കോൺസ്റ്റബിൾ സുരേഷ് കുമാർ ഐസ്ക്രീം, കുൽഫി, ഗോൾഗപ്പ തുടങ്ങിയ ഭക്ഷ്യവസ്തുക്കൾ തെരുവ് കച്ചവടക്കാരിൽ നിന്ന് വാങ്ങിയ ശേഷം പണം നൽകാതെ പോകാറുണ്ടെന്നാണ് ആരോപണം. പണം ആവശ്യപ്പെടുന്ന കച്ചവടക്കാരെ തന്റെ ഔദ്യോഗിക പദവി ഉപയോഗിച്ച് ഭീഷണിപ്പെടുത്തിയതായും പരാതിയുണ്ട്.സംഭവങ്ങളിലൊന്ന് കച്ചവടക്കാരൻ മൊബൈൽ ഫോണിൽ പകർത്തി സാമൂഹിക മാധ്യമങ്ങളിൽ പങ്കുവെച്ചതോടെയാണ് വിഷയം പുറത്തറിയുന്നത്. വീഡിയോ വ്യാപകമായി പ്രചരിച്ചതോടെ സംഭവം പോലീസിന്റെ ഉന്നത ഉദ്യോഗസ്ഥരുടെ ശ്രദ്ധയിൽപ്പെടുകയും അന്വേഷണം ആരംഭിക്കുകയും ചെയ്തു.അന്വേഷണത്തിൽ ആരോപണങ്ങൾ ശരിവെക്കപ്പെട്ടതിനെ തുടർന്ന് സുരേഷ് കുമാറിനെ സർവീസിൽ നിന്ന് പുറത്താക്കാൻ അധികൃതർ തീരുമാനിക്കുകയായിരുന്നു.ചെറിയ തുകയ്ക്ക് വേണ്ടി ഔദ്യോഗിക അധികാരം ദുരുപയോഗം ചെയ്ത നടപടി ഒടുവിൽ സർക്കാർ ജോലി തന്നെ നഷ്ടപ്പെടുത്തുന്ന സാഹചര്യത്തിലേക്കാണ് നയിച്ചതെന്ന് സംഭവത്തെക്കുറിച്ച് സാമൂഹിക മാധ്യമങ്ങളിൽ വ്യാപക ചർച്ച ഉയരുന്നുണ്ട്.