ബേപ്പൂർ: മലബാറിന്റെ ചരിത്രവും വ്യാപാര പൈതൃകവും പേറുന്ന ബേപ്പൂർ തുറമുഖം ഇന്ന് അവഗണനയുടെ വക്കിലാണെന്ന വിമർശനം ശക്തമാകുന്നു. ഒരുകാലത്ത് ഗുജറാത്ത്, മഹാരാഷ്ട്ര, ഗോവ, ലക്ഷദ്വീപ് തുടങ്ങിയ മേഖലകളുമായി സജീവ ചരക്കുഗതാഗത ബന്ധം പുലർത്തിയിരുന്ന തുറമുഖം അടിസ്ഥാന സൗകര്യങ്ങളുടെ അപര്യാപ്തതയും ആഴക്കുറവും മൂലം പ്രതിസന്ധിയിലാണെന്നാണ് വിലയിരുത്തൽ.തുറമുഖ വാർഫിന്റെ പല ഭാഗങ്ങളും തകർന്ന നിലയിലാണ്. ചോർന്നൊലിക്കുന്ന ഗോഡൗണുകൾ, പതിറ്റാണ്ടുകൾ പഴക്കമുള്ള ക്രെയിനുകൾ, മാലിന്യങ്ങളും സിമന്റ് കട്ടകളും നിറഞ്ഞ പരിസരം, ഉപയോഗശൂന്യമായ ഓയിൽ ബാരലുകളുടെ കൂമ്പാരങ്ങൾ എന്നിവ തുറമുഖത്തിന്റെ നിലവിലെ ദയനീയാവസ്ഥ വ്യക്തമാക്കുന്നു.മുമ്പ് പ്രതിമാസം 8 മുതൽ 10 വരെ ബാർജുകൾ എത്തിയിരുന്ന തുറമുഖത്ത് ഇപ്പോൾ ഒന്നോ രണ്ടോ ബാർജുകൾ മാത്രമാണ് എത്തുന്നത്. ലക്ഷദ്വീപിലേക്കുള്ള യാത്രാക്കപ്പൽ സർവീസ് വർഷങ്ങൾക്കുമുമ്പ് നിലച്ചതോടെ നിലവിൽ ചരക്കുഗതാഗതമാണ് തുറമുഖത്തിന്റെ പ്രധാന പ്രവർത്തനം.തുറമുഖത്തിന്റെ പ്രധാന വെല്ലുവിളി ആഴക്കുറവാണ്. നിലവിൽ ഏകദേശം 3.5 മീറ്റർ മാത്രം ആഴമുള്ളതിനാൽ വലിയ കപ്പലുകൾക്ക് പ്രവേശനം സാധ്യമല്ല. ആഴം 5.5 മീറ്ററാക്കി വർധിപ്പിച്ചാൽ കൂടുതൽ ബാർജുകൾക്ക് എത്താനാകുമെന്നും 8 മീറ്റർ ആഴം ലഭിച്ചാൽ 7,500 ടൺ വരെ ചരക്കുകളുമായി കപ്പലുകൾക്ക് സുരക്ഷിതമായി എത്താനാകുമെന്നും വിദഗ്ധർ ചൂണ്ടിക്കാട്ടുന്നു.2023-ൽ ആരംഭിച്ച ഡ്രെജിങ് പ്രവർത്തനങ്ങൾ അടിത്തട്ടിൽ പാറ കണ്ടെത്തിയതിനെ തുടർന്ന് നിർത്തിവെക്കേണ്ടിവന്നു. പാറ തുരന്ന് ആഴം വർധിപ്പിക്കുന്നതിനുള്ള 82.80 കോടി രൂപയുടെ പദ്ധതി നിലവിലുണ്ടെങ്കിലും പരിസ്ഥിതി അനുമതി ലഭിക്കാത്തതിനാൽ തുടർനടപടികൾ ആരംഭിച്ചിട്ടില്ല.ബേപ്പൂർ തുറമുഖത്തിന്റെ നവീകരണം ഒരു അടിസ്ഥാന സൗകര്യ വികസന പദ്ധതി മാത്രമല്ല, മലബാറിന്റെ സാമ്പത്തിക പുരോഗതിയുമായും തൊഴിൽ സാധ്യതകളുമായും നേരിട്ട് ബന്ധപ്പെട്ട വിഷയമാണെന്ന് വ്യാപാര-തൊഴിൽ മേഖലകൾ അഭിപ്രായപ്പെടുന്നു. വിഴിഞ്ഞം തുറമുഖം പോലെ തന്നെ ബേപ്പൂർ തുറമുഖത്തിനും ആവശ്യമായ പ്രാധാന്യവും നിക്ഷേപവും നൽകണമെന്ന് വിവിധ കോണുകളിൽ നിന്ന് ആവശ്യം ഉയരുന്നുണ്ട്.ചരിത്ര പൈതൃകവും ഭാവി സാധ്യതകളും ഒരുപോലെ ഉൾക്കൊള്ളുന്ന ബേപ്പൂർ തുറമുഖത്തെ ആധുനികവത്കരിക്കുന്നത് മലബാറിന്റെ സാമ്പത്തിക വളർച്ചയ്ക്ക് പുതിയ ദിശ നൽകുമെന്ന പ്രതീക്ഷയിലാണ് പ്രദേശവാസികളും വ്യാപാര സമൂഹവും.