തിരുവനന്തപുരം: സംസ്ഥാനത്തെ പട്ടികവർഗ വിദ്യാർഥികൾക്കായുള്ള കട്ടേല അംബേദ്കർ റെസിഡൻഷ്യൽ സ്കൂളിൽ നടന്ന പ്രവേശനോത്സവ ചടങ്ങിനിടെ മിഠായി വിതരണം ചെയ്ത രീതിയെ ചൊല്ലി വിവാദം. ചടങ്ങിൽ പങ്കെടുത്ത സ്ഥലം എം.എൽ.എ വി. മുരളീധരൻ വിദ്യാർഥികൾക്ക് മിഠായി കൈമാറിയ രീതിക്കെതിരെ സമൂഹമാധ്യമങ്ങളിൽ വ്യാപക വിമർശനമാണ് ഉയരുന്നത്.സംഭവത്തിന്റെ ദൃശ്യങ്ങൾ പ്രചരിച്ചതിന് പിന്നാലെ നിരവധി പേരാണ് വിമർശനവുമായി രംഗത്തെത്തിയത്. കുട്ടികൾക്ക് കൂടുതൽ മാന്യവും കരുതലോടെയുമായ സമീപനം വേണമായിരുന്നുവെന്നാണ് വിമർശകരുടെ അഭിപ്രായം.അതേസമയം, മുൻ എം.എൽ.എയും മന്ത്രിയുമായിരുന്ന കടകംപള്ളി സുരേന്ദ്രനും സ്കൂളുമായുള്ള ആത്മബന്ധവും സമൂഹമാധ്യമ ചർച്ചകളിൽ ഉയർന്നുവരുന്നുണ്ട്. വിദ്യാർഥികളുമായി അടുത്ത ബന്ധം പുലർത്തുകയും വിവിധ പരിപാടികളിൽ പങ്കെടുപ്പിക്കുകയും ചെയ്തിരുന്ന കടകംപള്ളിയെ കുട്ടികൾ സ്നേഹത്തോടെ “അപ്പാപ്പൻ” എന്ന് വിളിച്ചിരുന്നതായും നിരവധി പേർ ഓർമ്മപ്പെടുത്തുന്നു.വിവാദമായ സംഭവത്തിൽ എം.എൽ.എയുടെയോ ബന്ധപ്പെട്ട അധികൃതരുടെയോ ഔദ്യോഗിക പ്രതികരണം ലഭ്യമായിട്ടില്ല. സമൂഹമാധ്യമങ്ങളിൽ ഉയരുന്ന വിമർശനങ്ങളും പ്രതികരണങ്ങളും രാഷ്ട്രീയ ചർച്ചകൾക്കും വഴിവെച്ചിരിക്കുകയാണ്.വിദ്യാർഥികളുടെ ആത്മാഭിമാനവും ക്ഷേമവും മുൻനിർത്തി പൊതുപ്രതിനിധികൾ കൂടുതൽ കരുതലോടെയും ഉത്തരവാദിത്തത്തോടെയും പെരുമാറേണ്ടതുണ്ടെന്ന അഭിപ്രായമാണ് വിവിധ കോണുകളിൽ നിന്ന് ഉയരുന്നത്.