കോട്ടയം കുമരകത്ത് ഷാപ്പിൽ നിന്ന് ഭക്ഷണം കഴിച്ചതിന് പിന്നാലെ ദേഹാസ്വാസ്ഥ്യം അനുഭവപ്പെട്ട യുവാവ് മരിച്ച സംഭവത്തിൽ മരണകാരണം സംബന്ധിച്ച വ്യക്തത ലഭിക്കാൻ പൊലീസ് പോസ്റ്റ്മോർട്ടം ഉൾപ്പെടെയുള്ള വിശദമായ മെഡിക്കൽ റിപ്പോർട്ടിനായി കാത്തിരിക്കുകയാണ്. കുമരകം ചുള ഭാഗം സ്വദേശിയായ ജ്യോതിഷ് (41) ആണ് സ്വകാര്യ ആശുപത്രിയിൽ ചികിത്സയിലിരിക്കെ മരിച്ചത്. ഹൗസ്ബോട്ട് യാത്രയ്ക്കിടെ സുഹൃത്തുക്കളോടൊപ്പം ഒരു ഷാപ്പിൽ നിന്ന് മീൻകറിയും കള്ളും വാങ്ങി കഴിച്ച ശേഷമാണ് സംഘത്തിലെ ചിലർക്ക് വയറിളക്കം, ഛർദ്ദി, വയറുവേദന തുടങ്ങിയ ലക്ഷണങ്ങൾ അനുഭവപ്പെട്ടത്. ഏഴംഗ സംഘത്തിൽ അഞ്ചുപേർക്കാണ് ശാരീരിക അസ്വസ്ഥത ഉണ്ടായത്. സംഭവത്തിൽ നാല് പേർ ഇപ്പോഴും ചികിത്സയിലാണ്. രണ്ട് പേർക്ക് രോഗലക്ഷണങ്ങളൊന്നും ഉണ്ടായിട്ടില്ലെന്നാണ് വിവരം. ഭക്ഷ്യവിഷബാധയാണോ മരണകാരണമെന്ന് സ്ഥിരീകരിക്കാൻ പോസ്റ്റ്മോർട്ടം റിപ്പോർട്ടും മറ്റ് പരിശോധനാ ഫലങ്ങളും നിർണായകമാകുമെന്ന് അന്വേഷണ സംഘം അറിയിച്ചു. ഭക്ഷണം, പാനീയങ്ങൾ എന്നിവയുടെ സാമ്പിളുകൾ പരിശോധനയ്ക്കായി ശേഖരിച്ചിട്ടുണ്ടെന്നും ഫോറൻസിക്, ആരോഗ്യവകുപ്പ് റിപ്പോർട്ടുകൾ ലഭിച്ച ശേഷമേ മരണകാരണം സംബന്ധിച്ച് അന്തിമ നിഗമനത്തിലെത്താനാകൂവെന്നും പൊലീസ് വ്യക്തമാക്കി.