മയാമി: ലോക ഫുട്ബോളിലെ സൂപ്പർതാരം ലിയോണെൽ മെസ്സി ക്ക് അമേരിക്കൻ ലീഗായ മേജർ ലീഗ് Soccer മത്സരത്തിനിടെ പരിക്കേറ്റത് ആരാധകരിലും അർജന്റീന ടീമിലും ആശങ്ക ഉയർത്തി. ഇന്റർ മയാമിക്കായി കളിക്കുന്നതിനിടെ കാലിൽ അസ്വസ്ഥത അനുഭവപ്പെട്ടതിനെ തുടർന്ന് മെസി കളംവിടേണ്ടി വന്നതായാണ് റിപ്പോർട്ടുകൾ
.മത്സരത്തിനിടെ എതിർതാരവുമായി ഉണ്ടായ കൂട്ടിയിടിക്കുശേഷമാണ് മെസി വേദന പ്രകടിപ്പിച്ചത്. തുടർന്ന് മെഡിക്കൽ സംഘം ഉടൻ പരിശോധന നടത്തുകയും സുരക്ഷാ മുൻകരുതലായി താരത്തെ വിശ്രമിപ്പിക്കുകയുമായിരുന്നു. പരിക്ക് ഗുരുതരമാണോ എന്നതിൽ ക്ലബ്ബ് അധികൃതർ ഇതുവരെ ഔദ്യോഗിക വിശദീകരണം നൽകിയിട്ടില്ലെങ്കിലും ആരാധകർ ആശങ്കയിലാണ്.
അടുത്ത മാസം നടക്കാനിരിക്കുന്ന പ്രധാന അന്താരാഷ്ട്ര മത്സരങ്ങൾക്കും ലോകകപ്പ് യോഗ്യതാ പോരാട്ടങ്ങൾക്കും മുന്നോടിയായി മെസിയുടെ ഫിറ്റ്നസ് അർജന്റീനയ്ക്ക് നിർണായകമാണ്. ദേശീയ ടീമിന്റെ പ്രധാന കരുത്തായ താരത്തിന് ചെറിയ പരിക്കുപോലും വലിയ തിരിച്ചടിയാകുമെന്ന ആശങ്ക ഫുട്ബോൾ ലോകം പങ്കുവെക്കുന്നു.
2022 ലോകകപ്പ് വിജയത്തിന് ശേഷം അർജന്റീന ടീമിനെ മുന്നിൽ നിന്ന് നയിക്കുന്ന മെസി ഇപ്പോഴും മികച്ച ഫോമിലാണ്. എംഎൽഎസിൽ ഇന്റർ മയാമിക്കായി തകർപ്പൻ പ്രകടനമാണ് താരം കാഴ്ചവെക്കുന്നത്. നിരവധി ഗോളുകളും അസിസ്റ്റുകളും സ്വന്തമാക്കിയ താരം അമേരിക്കൻ ഫുട്ബോളിന്റെ ജനപ്രീതി വർധിപ്പിക്കുന്നതിലും വലിയ പങ്കുവഹിച്ചിട്ടുണ്ട്.മെസിയുടെ ആരോഗ്യനില സംബന്ധിച്ച കൂടുതൽ വിവരങ്ങൾ മെഡിക്കൽ പരിശോധനകൾക്ക് ശേഷമേ പുറത്തുവിടുകയുള്ളുവെന്ന് ക്ലബ്ബ് വൃത്തങ്ങൾ അറിയിച്ചു.
ഇതിനിടെ സമൂഹമാധ്യമങ്ങളിൽ ആരാധകർ താരത്തിന് വേഗം സുഖം പ്രാപിക്കട്ടെയെന്ന് ആശംസകൾ അറിയിച്ചുകൊണ്ടിരിക്കുകയാണ്.