സാങ്കേതികവിദ്യയുടെ ദുരുപയോഗത്തിനെതിരെ കർശന നടപടികൾ ആവശ്യപ്പെട്ട് കേന്ദ്ര സർക്കാർ.

ടെലഗ്രാമിൽ കുറ്റകൃത്യ ശൃംഖലകൾ സജീവം; ‘പുതിയ ഡാർക്ക് വെബ്’ എന്ന് കേന്ദ്ര സർക്കാർ

ന്യൂഡൽഹി: ജനപ്രിയ സന്ദേശവിനിമയ പ്ലാറ്റ്ഫോമായ Telegram ഗുരുതരമായ നിയമവിരുദ്ധ പ്രവർത്തനങ്ങളുടെ കേന്ദ്രമായി മാറുന്നുവെന്ന് കേന്ദ്ര സർക്കാർ. കുറ്റവാളികളും സൈബർ തട്ടിപ്പുകാരും തീവ്രവാദ സംഘടനകളും വ്യാപകമായി ടെലഗ്രാം ഉപയോഗിക്കുന്നതിനാൽ ഇത് “പുതിയ ഡാർക്ക് വെബ്” പോലെയാണെന്ന് കേന്ദ്രം Delhi High Court-യെ അറിയിച്ചു.

ടെലഗ്രാമിലെ ചില ചാനലുകൾക്കും ഉള്ളടക്കങ്ങൾക്കുമെതിരെ സ്വീകരിച്ച നടപടികൾ ചോദ്യം ചെയ്ത് കമ്പനി സമർപ്പിച്ച ഹരജിയിലാണ് കേന്ദ്രത്തിന്റെ വിശദീകരണം. നീറ്റ് ചോദ്യപേപ്പർ ചോർച്ച, സൈബർ തട്ടിപ്പുകൾ, മയക്കുമരുന്ന് കടത്ത്, തീവ്രവാദ പ്രവർത്തനങ്ങൾ, സാമ്പത്തിക തട്ടിപ്പുകൾ തുടങ്ങി നിരവധി കുറ്റകൃത്യങ്ങൾക്ക് ടെലഗ്രാം ഉപയോഗിക്കപ്പെടുന്നതായി സർക്കാർ ആരോപിച്ചു.

പൗരന്മാരുടെ മൊബൈൽ നമ്പറുകൾ, ആധാർ വിവരങ്ങൾ തുടങ്ങിയ സ്വകാര്യ ഡാറ്റകൾ അനധികൃതമായി പങ്കുവെച്ച് തട്ടിപ്പുകൾ നടത്തുന്നതായും സർക്കാർ ചൂണ്ടിക്കാട്ടി. ദേശീയ സൈബർ ക്രൈം റിപ്പോർട്ടിങ് പോർട്ടലിൽ ടെലഗ്രാമുമായി ബന്ധപ്പെട്ട പരാതികളുടെ എണ്ണം തുടർച്ചയായി ഉയരുകയാണെന്നും കേന്ദ്രം കോടതിയെ അറിയിച്ചു.

പകർപ്പവകാശമുള്ള സിനിമകളും വെബ് സീരീസുകളും അനധികൃതമായി പ്രചരിപ്പിക്കുന്ന പ്രധാന വേദികളിലൊന്നായി ടെലഗ്രാം മാറിയതായും ഇതുമൂലം വിനോദമേഖലയ്ക്ക് കോടിക്കണക്കിന് രൂപയുടെ നഷ്ടമുണ്ടാകുന്നതായും സത്യവാങ്മൂലത്തിൽ പറയുന്നു.

രാജ്യസുരക്ഷ, സൈബർ സുരക്ഷ, സാമ്പത്തിക സുരക്ഷ എന്നിവയെ ബാധിക്കുന്ന സാഹചര്യം ടെലഗ്രാമിന്റെ ദുരുപയോഗം സൃഷ്ടിക്കുന്നുവെന്നാണ് കേന്ദ്ര സർക്കാരിന്റെ നിലപാട്.

📰 മലബാർ ജാഗ്രത ന്യൂസ് ലൈവ്