: കനത്ത മഴയെ അവഗണിച്ച് സ്വകാര്യ ബസ് ഉടമകളും തൊഴിലാളികളും വയനാട്ടിൽ പ്രതിഷേധ പ്രകടനം നടത്തി. സ്വകാര്യ ബസ് മേഖലയിലെ കടുത്ത സാമ്പത്തിക പ്രതിസന്ധിക്ക് പരിഹാരം കാണണമെന്നാവശ്യപ്പെട്ടാണ് ഇന്ന് (ജൂൺ 29) ജില്ലയിലെ സ്വകാര്യ ബസ് ഉടമകളുടെയും തൊഴിലാളി യൂണിയനുകളുടെയും നേതൃത്വത്തിൽ സൂചനാ പണിമുടക്ക് ആചരിച്ചത്. പ്രതിഷേധത്തിന്റെ ഭാഗമായി കലക്ടറേറ്റിലേക്ക് മാർച്ചും സംഘടിപ്പിച്ചു. പ്രിയദർശിനി സ്ത്രീ സൗജന്യ യാത്രാ പദ്ധതിക്ക് ശേഷം പല പ്രധാന റൂട്ടുകളിലും കെഎസ്ആർടിസി സർവീസുകൾ വർധിച്ചതും പ്രവർത്തനച്ചെലവ് കുത്തനെ ഉയർന്നതും സ്വകാര്യ ബസ് മേഖലയെ വലിയ പ്രതിസന്ധിയിലാക്കിയെന്നാണ് സംഘടനകളുടെ ആരോപണം. സർക്കാർ അടിയന്തരമായി ഇടപെട്ട് പ്രശ്നങ്ങൾക്ക് പരിഹാരം കാണണമെന്നാണ് സമരക്കാരുടെ ആവശ്യം.