കോഴിക്കോട് ജില്ലയിലെ കൊടുവള്ളിയിൽ മദ്യപാനത്തിനിടയിലുണ്ടായ തർക്കത്തെ തുടർന്ന് യുവാവിനെ സ്വന്തം സഹോദരൻ വെട്ടിക്കൊലപ്പെടുത്തി. വലിയപറമ്പ് താണിക്കംപൊയിൽ സ്വദേശിയായ പ്രസാദ് ആണ് കൊല്ലപ്പെട്ടത്. സംഭവത്തിൽ പ്രസാദിന്റെ സഹോദരനായ പ്രമോദിനെ പോലീസ് അറസ്റ്റ് ചെയ്തിട്ടുണ്ട്. ഇന്നലെ രാത്രി പത്തരയോടെയാണ് നാടിനെ നടുക്കിയ ഈ ദാരുണമായ കൊലപാതകം നടന്നത്. ഇവർ തമ്മിൽ നേരത്തെ തന്നെ സ്വത്തുമായി ബന്ധപ്പെട്ട തർക്കങ്ങൾ നിലനിന്നിരുന്നുവെന്നും ഈ വിഷയത്തിൽ കോടതിയുടെ ഉത്തരവ് വന്നിരുന്നതായും വിവരമുണ്ട്. എന്നാൽ, ഇന്നലെ രാത്രി മദ്യപിക്കുന്നതിനിടയിൽ പെട്ടെന്നുണ്ടായ വാക്കേറ്റവും തർക്കവുമാണ് കൊലപാതകത്തിൽ കലാശിച്ചതെന്നാണ് പോലീസ് നൽകുന്ന പ്രാഥമിക വിവരം. കൊടുവള്ളി പോലീസ് ഈ സംഭവത്തിൽ ഇതിനോടകം തന്നെ വിശദമായ അന്വേഷണം ആരംഭിച്ചിട്ടുണ്ട്.