വയനാട് മേപ്പാടി പഞ്ചായത്തിലെ കള്ളാടിയിൽ തുരങ്കപാത നിർമാണവുമായി ബന്ധപ്പെട്ട് അശാസ്ത്രീയമായി മണ്ണ് കൂട്ടിയിട്ടതിനെ തുടർന്നുണ്ടായ ദുരന്തത്തിൽ രക്ഷാപ്രവർത്തനം ഊർജിതമായി തുടരുകയാണെന്ന് മന്ത്രി അഡ്വ. ടി. സിദ്ദിഖ് പറഞ്ഞു. ഉണ്ടായത് സ്വാഭാവിക ഉരുൾപൊട്ടലല്ലെന്നും, മനുഷ്യനിർമിത ദുരന്തമാണിതെന്നും മന്ത്രി വ്യക്തമാക്കി.
സംഭവസ്ഥലത്ത് ഫയർഫോഴ്സ്, എൻഡിആർഎഫ്, പൊലീസ്, റവന്യൂ വിഭാഗങ്ങൾ ഉൾപ്പെടെയുള്ള വിവിധ സേനകൾ രക്ഷാപ്രവർത്തനം തുടരുകയാണ്. കൂടുതൽ ആളുകൾ മണ്ണിനടിയിൽ കുടുങ്ങിക്കിടക്കുന്നുണ്ടോ എന്നറിയാൻ അടിയന്തര പരിശോധന പുരോഗമിക്കുകയാണ്. പരിക്കേറ്റവരെ ആശുപത്രികളിലേക്ക് മാറ്റി ചികിത്സ ഉറപ്പാക്കിയതായും മന്ത്രി അറിയിച്ചു.
മഴക്കാലത്ത് മണ്ണ് നീക്കലും സംഭരണവും നിർത്തിവയ്ക്കാനും അപകടസാധ്യതയുള്ള കുടുംബങ്ങളെ സുരക്ഷിത സ്ഥലങ്ങളിലേക്ക് മാറ്റിപ്പാർപ്പിക്കാനുമുള്ള നിർദേശങ്ങൾ നേരത്തെ നൽകിയിരുന്നുവെങ്കിലും അവ പാലിക്കാത്തതിൽ ഗുരുതര വീഴ്ച ഉണ്ടായതായും മന്ത്രി ചൂണ്ടിക്കാട്ടി. നിർദേശങ്ങൾ അവഗണിച്ചതിൽ ഉത്തരവാദികൾക്കെതിരെ കർശന നടപടി സ്വീകരിക്കുമെന്നും അദ്ദേഹം വ്യക്തമാക്കി.
രക്ഷാപ്രവർത്തനം കൂടുതൽ വേഗത്തിലാക്കാൻ ആവശ്യമായ എല്ലാ സർക്കാർ സംവിധാനങ്ങളും സജ്ജമാക്കിയിട്ടുണ്ടെന്നും, ദുരന്തബാധിതർക്കുള്ള പുനരധിവാസ നടപടികളും ഏകോപിപ്പിച്ചുവരികയാണെന്നും മന്ത്രി പറഞ്ഞു.