തെഹ്റാൻ: ഹോർമുസ് കടലിടുക്കിൽ സുരക്ഷ പുനഃസ്ഥാപിക്കാനും അന്താരാഷ്ട്ര കപ്പൽഗതാഗതം സാധാരണ നിലയിലാക്കാനും ബ്രിട്ടന്റെ നേതൃത്വത്തിൽ ബഹുരാഷ്ട്ര സൈനിക ദൗത്യം ആരംഭിക്കുന്നു. ഇറാൻ ഏർപ്പെടുത്തിയ ഉപരോധത്തെത്തുടർന്ന് ആഗോള ഊർജ വിതരണ ശൃംഖല താറുമാറായ സാഹചര്യത്തിലാണ് ബ്രിട്ടനും ഫ്രാൻസും ചേർന്ന് നിർണായക നീക്കവുമായി മുന്നോട്ട് വന്നിരിക്കുന്നത്.അമേരിക്കയുടെയും ഇസ്രായേലിന്റെയും ആക്രമണങ്ങൾക്ക് മറുപടിയായാണ് ലോകത്തിലെ ഏറ്റവും പ്രധാനപ്പെട്ട എണ്ണക്കടത്തു പാതകളിലൊന്നായ ഹോർമുസ് കടലിടുക്ക് ഇറാൻ അടച്ചത്. ആഗോളതലത്തിൽ വിതരണം ചെയ്യപ്പെടുന്ന എണ്ണയുടെ വലിയൊരു വിഹിതം ഈ കടൽപ്പാതയിലൂടെ കടന്നുപോകുന്നതിനാൽ ഉപരോധം അന്താരാഷ്ട്ര വിപണിയിൽ വൻ പ്രതിസന്ധിക്ക് ഇടയാക്കി. എണ്ണവില കുത്തനെ ഉയർന്നതോടെ പല രാജ്യങ്ങളുടെയും സാമ്പത്തിക മേഖലയിലും തിരിച്ചടി അനുഭവപ്പെട്ടു.ഇതിനിടെ മേഖലയിലെ സുരക്ഷ ഉറപ്പാക്കാൻ ബ്രിട്ടീഷ് റോയൽ നേവിയുടെ അത്യാധുനിക യുദ്ധക്കപ്പലായ എച്ച്എംഎസ് ഡ്രാഗൺ ഇതിനകം തന്നെ മേഖലയിലേക്ക് തിരിച്ചിട്ടുണ്ട്. മൈനുകൾ കണ്ടെത്തി നിർവീര്യമാക്കാനുള്ള ഡ്രോണുകൾ, ശത്രു ഡ്രോണുകളെ പ്രതിരോധിക്കാനുള്ള പ്രതിരോധ സംവിധാനങ്ങൾ, ടൈഫൂൺ യുദ്ധവിമാനങ്ങൾ എന്നിവയും സജ്ജമാക്കിയിട്ടുണ്ട്. ഫ്രാൻസിന്റെ ആണവോർജത്തിൽ പ്രവർത്തിക്കുന്ന വിമാനവാഹിനിക്കപ്പലായ ചാൾസ് ഡി ഗല്ലെയും ദൗത്യത്തിൽ പങ്കാളിയാകും.ജർമനി, ഇറ്റലി, കാനഡ, ഓസ്ട്രേലിയ ഉൾപ്പെടെ 40-ലധികം രാജ്യങ്ങളുടെ പിന്തുണ ദൗത്യത്തിനുണ്ടെന്നാണ് റിപ്പോർട്ടുകൾ. അതേസമയം, വിദേശ യുദ്ധക്കപ്പലുകൾ ഹോർമുസ് കടലിടുക്കിലെത്തിയാൽ ശക്തമായ തിരിച്ചടി നൽകുമെന്ന് ഇറാൻ മുന്നറിയിപ്പ് നൽകി. മേഖലയിൽ വിന്യസിച്ചിരിക്കുന്ന ഡ്രോണുകൾ, ക്രൂയിസ് മിസൈലുകൾ, പീരങ്കിപ്പട എന്നിവ അന്താരാഷ്ട്ര സൈനിക സഖ്യത്തിന് വലിയ വെല്ലുവിളിയാകുമെന്നാണ് പ്രതിരോധ വിദഗ്ധരുടെ വിലയിരുത്തൽ.സായുധ സംഘർഷങ്ങൾ പൂർണമായി അവസാനിച്ചതിന് ശേഷമേ കടലിടുക്ക് പൂർണമായും തുറക്കാനുള്ള നടപടികൾ ആരംഭിക്കൂ എന്നാണ് ബ്രിട്ടീഷ് പ്രധാനമന്ത്രി വ്യക്തമാക്കിയിരിക്കുന്നത്. കടൽപ്പാതയിലെ മൈനുകൾ നീക്കം ചെയ്യുക, ചരക്ക് കപ്പലുകൾക്ക് സുരക്ഷ ഉറപ്പാക്കുക, ആഗോള ഊർജ പ്രതിസന്ധി പരിഹരിക്കുക എന്നിവയാണ് ദൗത്യത്തിന്റെ പ്രധാന ലക്ഷ്യങ്ങൾ. എന്നാൽ മേഖലയിലെ സംഘർഷാവസ്ഥ തുടരുന്നതിനാൽ ഏത് സമയത്തും പുതിയ പ്രകോപനങ്ങൾക്ക് സാധ്യതയുണ്ടെന്ന ആശങ്കയും ശക്തമാണ്.