വധശ്രമക്കേസിൽ ഒളിവിലായിരുന്ന ബിജെപി കോർപ്പറേഷൻ കൗൺസിലറും പ്രതിയുമായ സുഗതനെ പിടികൂടുന്നതിനിടെ വട്ടിയൂർക്കാവിൽ സംഘർഷം. വാഴോട്ടുകോണത്ത് പ്രതിയെ അറസ്റ്റ് ചെയ്യാനെത്തിയ പോലീസ് സംഘത്തെ സുഗതനും അനുയായികളും ചേർന്ന് ആക്രമിച്ചതായി പോലീസ് അറിയിച്ചു.ആക്രമണത്തിൽ വട്ടിയൂർക്കാവ് സി.ഐ. വിപിനും എസ്.ഐ. അഭിജിത്തിനും പരിക്കേറ്റു. സ്ഥിതിഗതികൾ നിയന്ത്രണാതീതമായതോടെ സി.ഐ. വിപിൻ സർവീസ് റിവോൾവർ ഉപയോഗിച്ച് ആകാശത്തേക്ക് മുന്നറിയിപ്പ് വെടിയുതിർക്കുകയായിരുന്നു. തുടർന്ന് പ്രതിയെ കീഴ്പ്പെടുത്തി കസ്റ്റഡിയിലെടുത്തു.പരിക്കേറ്റ ഉദ്യോഗസ്ഥരെ ഉടൻ ആശുപത്രിയിൽ പ്രവേശിപ്പിച്ചു. സംഭവത്തിൽ കൂടുതൽ പേർ ഉൾപ്പെട്ടിട്ടുണ്ടോയെന്ന് പരിശോധിച്ച് വരികയാണെന്ന് പോലീസ് അറിയിച്ചു.