:കോഴിക്കോട് ഫറോക്ക് സ്വദേശിക്ക് നിപ സ്ഥിരീകരിച്ചു; സ്വകാര്യ ആശുപത്രിയിൽ തീവ്രപരിചരണത്തിൽകോഴിക്കോട്: ഫറോക്ക് സ്വദേശിയായ 43 വയസ്സുകാരനിൽ നിപ വൈറസ് ബാധ സ്ഥിരീകരിച്ചു. രോഗലക്ഷണങ്ങളോടെ ചികിത്സ തേടിയ ഇയാൾ നിലവിൽ കോഴിക്കോട് സ്വകാര്യ ആശുപത്രിയിലെ തീവ്രപരിചരണ വിഭാഗത്തിൽ (ICU) ചികിത്സയിലാണ്.കോഴിക്കോട് മെഡിക്കൽ കോളേജ് ആശുപത്രി ലബോറട്ടറിയിൽ നടത്തിയ പരിശോധനയിലാണ് ആദ്യം നിപ വൈറസ് ബാധ സ്ഥിരീകരിച്ചത്. കൂടുതൽ സ്ഥിരീകരണത്തിനായി രോഗിയുടെ സാംപിളുകൾ പൂനെയിലെ National Institute of Virology (NIV)യിലേക്ക് അയച്ചിട്ടുണ്ട്.ഫറോക്കിലെ ഒരു പഴയ കെട്ടിടം വൃത്തിയാക്കുന്ന ജോലിയിൽ ഏർപ്പെട്ടിരുന്ന ക്ലീനിംഗ് തൊഴിലാളിയാണ് രോഗി. ഈ കെട്ടിടവുമായി ബന്ധപ്പെട്ട സാഹചര്യങ്ങളാണ് രോഗബാധയുടെ ഉറവിടമെന്നാണ് ആരോഗ്യവകുപ്പ് സംശയിക്കുന്നത്.ആരോഗ്യപ്രശ്നങ്ങളെ തുടർന്ന് നേരത്തെ ഒരു സ്വകാര്യ ആശുപത്രിയിൽ ചികിത്സ തേടിയിരുന്ന ഇയാൾ പിന്നീട് ഡിസ്ചാർജ് ചെയ്യപ്പെട്ടിരുന്നു. എന്നാൽ തുടർന്ന് അബോധാവസ്ഥ അനുഭവപ്പെട്ടതിനെ തുടർന്ന് വീണ്ടും ചികിത്സ തേടുകയായിരുന്നു.മദ്യപാന ശീലത്തിന്റെ പശ്ചാത്തലത്തിൽ ആദ്യം രോഗിയുടെ അസ്വസ്ഥതകൾ മദ്യവിമുക്തി (Withdrawal) ലക്ഷണങ്ങളാണെന്നാണ് സംശയിച്ചത്. ഇതേ തുടർന്ന് അദ്ദേഹത്തെ ഒരു ഡി-അഡിക്ഷൻ സെന്ററിലും പ്രവേശിപ്പിച്ചിരുന്നു. പിന്നീട് നടത്തിയ വിശദമായ പരിശോധനകളിലാണ് നിപ വൈറസ് ബാധ സ്ഥിരീകരിച്ചത്.സംഭവത്തെ തുടർന്ന് ആരോഗ്യവകുപ്പ് ജാഗ്രത ശക്തമാക്കിയിട്ടുണ്ട്. രോഗിയുമായി സമ്പർക്കത്തിലേർപ്പെട്ടവരെ കണ്ടെത്തുന്നതിനും നിരീക്ഷണത്തിലാക്കുന്നതിനുമുള്ള നടപടികൾ പുരോഗമിക്കുകയാണ്.