ഫറോക്ക്: ഫറോക്ക് താലൂക്ക് ആശുപത്രിയിൽ ചികിത്സാ അനാസ്ഥയെ തുടർന്ന് പിതാവ് മരിച്ചെന്ന ഗുരുതര ആരോപണവുമായി കുടുംബം രംഗത്ത്. ശ്വാസതടസ്സം അനുഭവപ്പെട്ടതിനെ തുടർന്ന് മോഹൻദാസിനെ ആശുപത്രിയിലെത്തിച്ചെങ്കിലും, ഡ്യൂട്ടിയിലുണ്ടായിരുന്ന ജീവനക്കാർ സമയോചിതമായി ശ്രദ്ധ നൽകിയില്ലെന്നാണ് മകന്റെ ആരോപണം.
ആശുപത്രിയിലെ ചില ചികിത്സാ ഉപകരണങ്ങൾ ശരിയായി പ്രവർത്തിച്ചില്ലെന്നും, ജീവനക്കാരുടെ ഭാഗത്ത് ഗുരുതര അനാസ്ഥ ഉണ്ടായെന്നും കുടുംബം ആരോപിക്കുന്നു. പിതാവിന്റെ ആരോഗ്യനില വഷളായതിനെ തുടർന്ന് മറ്റൊരു ആശുപത്രിയിലേക്ക് മാറ്റാൻ ആവശ്യപ്പെട്ടെങ്കിലും അതിന് ആവശ്യമായ നടപടി സ്വീകരിച്ചില്ലെന്നും കുടുംബം പറയുന്നു.
തുടർന്ന് ഏകദേശം അരമണിക്കൂറിന് ശേഷം മോഹൻദാസ് മരിച്ചതായി ആശുപത്രി അധികൃതർ അറിയിച്ചതായും മക്കൾ ആരോപിച്ചു.
സംഭവത്തിൽ സമഗ്ര അന്വേഷണം ആവശ്യപ്പെട്ട് മുഖ്യമന്ത്രിക്കും ആരോഗ്യ മന്ത്രിക്കും പ്രാദേശിക എം.എൽ.എയ്ക്കും പരാതി നൽകിയതായി കുടുംബം അറിയിച്ചു. പരാതി ലഭിച്ചതായും സംഭവത്തിൽ അന്വേഷണം ആരംഭിച്ചിട്ടുണ്ടെന്നും ഫറോക്ക് താലൂക്ക് ആശുപത്രി സൂപ്രണ്ട് അറിയിച്ചു.